Bakı Ekspo Mərkəzində “Beynəlxalq STEAM Azərbaycan Festivalı 2022”yə (SAF-2022) start verilib. Bu barədə 5 dekabr tarixində Report məlumat verib.
Festivalın açılış mərasimində elm və təhsil naziri Emin Əmrullayev, dövlət rəsmiləri, deputatlar iştirak ediblər.
Bildirilib ki, festivalın keçirilməsində məqsəd STEAM əsaslı tədrisin təşviqi, şagirdlər arasında XXI əsr bacarıqlarının inkişaf etdirilməsi, yaradıcı, rəqəmsal texnologiya biliciləri olan şagird və tələbələrin aşkarlanması, şəbəkələşməsi, eləcə də innovasiyalar və rəqəmsallaşma üzrə beynəlxalq təcrübənin öyrənilməsindən ibarətdir.
Festival 10 kateqoriya üzrə yarış, həmçinin 1 kateqoriya üzrə innovativ layihələr sərgisi formatında təşkil edilib.
SAF 2022-yə ümumilikdə 350 komandadan 1 312 nəfər iştirak hüququ qazanıb. Festivala həm yerli, həm də xarici iştirakçılar qatılıblar. Əcnəbi iştirakçılar Türkiyə, Böyük Britaniya, İsveç, Estoniya, Özbəkistan, Qazaxıstan və Türkmənistanı təmsil edirlər.
