Tibbi Ərazi Bölmələrini İdarəetmə Birliyinin (TƏBİB) tabeliyindəki Xətai Tibb Mərkəzinin Ginekologiya və doğum şöbəsi əsaslı təmir olunub. Bu barədə İnsanoid TƏBİB-ə istinadən bu gün, 20 may tarixində xəbər verir.
Şöbənin əsaslı təmir olunduqdan sonra açılışı baş tutub.
Mərasimdə TƏBİB-nin Müşahidə Şurasının sədri, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, TƏBİB-nin İcraçı direktoru Vüqar Qurbanov, İcraçı direktorun müavini Anar İsrafilov, TƏBİB-nin aidiyyəti struktur bölmə rəhbərləri, Xətai Tibb Mərkəzinin direktoru Ələkbər Tağıyev, tibb müəssisəsinin əməkdaşları və b. iştirak ediblər.
Xəstəxananın ikinci mərtəbəsində yerləşən 22 çarpayıdan ibarət şöbə 2 əməliyyat, 2 manipulyasiya, ginekologiya və doğuş otağı olmaqla 2 qəbul, 1 sterilizasiya otaqlarından ibarətdir. Şöbədə 1 funksional diaqnostika, 5 palata, daha 5 uşaq palatası, 2 əməliyyat öncəsi geyim otağı var.
Hazırda şöbədə 10 mama-ginekoloq, 3 həkim-neonatoloq, 5 mama, 10 tibb bacısı fəaliyyət göstərir.
Xətai Tibb Mərkəzi 2 korpusdan, 152 çarpayıdan ibarətdir. Tibb mərkəzində Terapiya, Nevrologiya, Reanimasiya və intensiv terapiya, Ümumi cərrahiyyə və uşaq cərrahiyyəsi şöbələri, Bakı şəhəri üzrə yeganə 24 saat təcili və təxirəsalınmaz xidmət göstərən Otorinolarinqologiya şöbəsi var.
