Hazırda 46 pandemiya tibb müəssisəsindən 7-si fəaliyyətini davam etdirir. Bu barədə 30 mart tarixində Report TƏBİB-ə istinadən məlumat verib.
Məlumatda bildirilib ki, növbəti təlimat verilənədək 7 saylı Uşaq Yoluxucu Xəstəxanası, FHN Modul, Quba Rayon Mərkəzi Xəstəxanası, Kiliniki Tibb Mərkəzi, Gəncə Modul, Sabirabad Rayon Mərkəzi Xəstəxanasının Pandemiya tibb müəssisəsi kimi fəaliyyəti dayandırılıb.
Bakı-Abşeron bölgəsi üzrə 4 tibb müəssisəsi - Yeni Klinika, Mərkəzi Gömrük Xəstəxanası, Məhəmmədli modul, Elmi-Tədqiqat Ağciyər Xəstəlikləri İnstitutu (ETACXİ) fəaliyyətini qismən davam etdirir.
Həmçinin qeyd olunub ki, qərb bölgəsi üzrə 2 tibb müəssisəsi - Ağdaş Rayon Mərkəzi Xəstəxanası, Şəmkir Rayon Kür Qəsəbə Xəstəxanası, cənub bölgəsi üzrə 1 tibb müəssisəsi - Masallı Rayon Mərkəzi Xəstəxanası fəaliyyətini qismən davam etdirir.
***
10:35
Azərbaycanda bəzi pandemiya müəssisələri və modul tipli xəstəxanaların fəaliyyəti dayandırılıb. Bu haqda martın 30-da TƏBİB-ə istinadən Report xəbər verib.
Bu addım koronavirusa yoluxma sayında müşahidə edilən azalma ilə əlaqədar olaraq atılıb.
"Bölgələrdə və Bakıda COVID-19-la mübarizəyə cəlb edilmiş bəzi xəstəxanalarda ənənəvi xidmət bərpa edilib", - deyə bildirilib.
Eyni zamanda, qurumdan modul tipli xüsusi xəstəxanalarda çalışan tibb işçiləri barədə də məlumat verilib: “Burada fəaliyyət göstərənlər xəstəxanalarda çalışan həkimlər idi. Yəni heç bir həkim çalışdığı yerdən çıxarılmamışdı. Sadəcə onlar COVİD-19-la mübarizəyə cəlb olunmuşdular. Bundan sonra da ənənəvi xidmətlərin göstərilməsi üzrə fəaliyyətlərini davam etdirəcəklər”.
Qeyd edək ki, son sutkada Azərbaycanda koronavirusa 48 yeni yoluxma qeydə alınıb. Ölkə üzrə aktiv koronavirus xəstələrinin sayı isə 308 nəfər təşkil edir.
