İlham Əliyev 24 dekabr 1961-ci ildə Bakı şəhərində anadan olub.
Əliyev ilk təhsilini Bakı şəhərində 6 saylı orta məktəbdə alıb. O, 1977-1982-ci illərdə Moskva Dövlət Beynəlxalq Münasibətlər İnstitutunda oxuyub, 1982-ci ildə isə həmin təhsil müəssisəsinin aspiranturasına daxil olub. İlham Əliyev 1985-1990-cı illərdə bu institutda müəllim kimi fəaliyyət göstərib. O, 1991-1994-cü illər ərzində özəl biznes sahəsində çalışıb və bir sıra istehsal-kommersiya müəssisələrinə rəhbərlik edib.
İlham Əliyev 1994-2003-cü illərdə Azərbaycan Respublikası Dövlət Neft Şirkətinin vitse-prezidenti, bir müddət sonra isə birinci vitse-prezidenti olub.
O, 2001-2003-cü illərdə Avropa Şurası Parlament Assambleyasında (AŞPA) Azərbaycan Respublikası Milli Məclisinin nümayəndə heyətinin rəhbəri olub. Əliyev 2003-cü ildə Avropa Şurası Parlament Assambleyası sədrinin müavini, AŞPA-nın Büro üzvü seçilib. Əliyev 4 avqust 2003-cü ildə Azərbaycan Respublikasının Baş naziri təyin olunub.
İlham Əliyev 2003, 2008, 2013 və 2018-ci illərdə Azərbaycan Respublikasının Prezidenti seçilib.
İlham Əliyevin uğurlu siyasəti nəticəsində 27 sentyabr 2020-ci ildə başlanılan Vətən müharibəsində Azərbaycan qələbə qazana bildi. 44 gün davam edən müharibədə Azərbaycan Respublikası 30 il işğal altında olan torpaqlarını azad etdi.
