Bu gün, noyabrın 15-də, Fransa Senatında Azərbaycan əleyhinə qətnamə layihəsinin müzakirə olunacağı gün Azərbaycan diasporunun nümayəndələri aksiya keçirəcəklər.
AZfront-dan verilən məlumata əsasən, aksiya Paris vaxtı ilə saat 10:00-da, Bakı vaxtı ilə saat 13:00-da Fransa Senatının qarşısında keçiriləcək.
Paris vaxtı ilə saat 14:30-da, Bakı vaxtı ilə 17:30-da Senatda Azərbaycan əleyhinə qətnamə layihəsi səsə qoyulacaq. Eyni zamanda İrəvanda Opera Teatrının yanında bu qətnaməyə dəstək aksiyası keçiriləcək.
Paris vaxtı ilə saat 17:30-da, Bakı vaxtı ilə isə 20:30-da Senatın qarşısında erməni diasporunun nümayəndələrinin nümayişi keçiriləcək. İştirakçılar Senat üzvlərinə dəstək və təşəkkürlərini bildirmək niyyətindədirlər.
Xatırladaq ki, 3 oktyabr 2022-ci il tarixində Fransa Senatında ölkəmizə qarşı qətnamə layihəsi təqdim edilib. Qətnamə layihəsində Fransa hakimiyyətinin və digər Avropa İttifaqı ölkələrinin “Azərbaycandan idxal edilən qaz və neftə embarqo tətbiq etmək” çağırışı yer alıb, ölkəmiz Beynəlxalq Cinayət Məhkəməsi ilə təhdid edilib.
Buna cavab olaraq, oktyabrın 11-də Fransanın Mesopinions.com saytında xalqımız adından Fransa Senatına və xalqına ünvanlanan petisiya yerləşdirilib. İndiyə kimi petisiya 125 000-dən çox imza toplayıb.
