Vətən müharibəsindən sonra, 10 noyabr 2020-ci ildə Azərbaycanın Prezidenti İlham Əliyev, Rusiyanın Prezidenti Vladimir Putin və Ermənistanın Baş naziri Nikol Paşinyan arasında üçtərəfli Bəyanat imzalanmışdır. Bəyanata əsasən, Laçın rayonu dekabrın 1-də erməni silahlı qüvvələrindən təmizlənərək Azərbaycana qaytarılmışdır.
Bu müddət ərzində ermənilər Laçın şəhərində və rayon ərazisində dağıntılar törədib, rayonu tərk edərkən binaları, evləri, tikililəri talan edib, yandırıb, ağacları qırıb, ekoloji terrora əl atıblar.
Bəyanata uyğun olaraq, Dağlıq Qarabağı Ermənistanla birləşdirən və Laçın şəhərindən keçən Laçın dəhlizi Rusiya Sülhməramlı qüvvələrinin nəzarətinə keçmişdir. Lakin iki il ərzində Laçın və Şuşa şəhərlərindən yan keçən yeni dəhlizin marşrutu müəyyyən edilmişdir. Yeni yolun çəkilməsi ilə 26 avqust 2022-ci ildə Laçın şəhəri, Sus və Zabux kəndləri, həmçinin Azərbaycanın nəzarətinə qaytarılmışdır.
Laçın rayonu 18 may 1992-ci ildə Ermənistan silahlı birləşmələri tərəfindən işğal olunmuşdur. İşğal nəticəsində 63 341 Laçın rayon sakini Azərbaycanın müxtəlif bölgələrinə qaçmaq məcburyyətində qalıb, 300-dən artıq hərbçi, eləcə də mülki şəxs həlak olub və itkin düşüb. Rayonda 8 950 bina, o cümlədən 7 sənaye və tikinti müəssisəsi, 471 xidmət idarəsi, 154 məktəb, yüzlərlə tarix-mədəniyyət abidəsinə işğal nəticəsində ziyan dəyib.
