Ümummilli Lider Heydər Əlirza oğlu Əliyev 10 may 1923-cü ildə Naxçıvan şəhərində anadan olub.
O, 1939-cu ildə Naxçıvan Pedaqoji Texnikumunda təhsil alıb. Lakin İkinci Dünya müharibəsinin başlanması ilə əlaqədar təhsilini bitirə bilməyib. 1957-ci ildə indiki BDU-nun tarix fakültəsini bitirib.
1944-cü ildən təhlükəsizlik orqanlarında çalışan Heydər Əliyev 1967-ci ildə Azərbaycan SSR Nazirlər Soveti yanında Dövlət Təhlükəsizliyi Komitəsinin sədri vəzifəsinə təyin edilib.
Heydər Əliyev 14 iyul 1969-cu ildə Azərbaycan Kommunist Partiyası Mərkəzi Komitəsinin birinci katibi seçilib. 1970-ci illərdə isə SSRİ Ali Soveti İttifaq Sovetində, sonra isə SSRİ Nazirlər Sovetində çalışıb. Sovet İttifaqı Kommunist Partiyası Mərkəzi Komitəsinin sonuncu Baş Katibi Mixail Qorbaçovun siyasətinə etiraz olaraq, Heydər Əliyev 1987-ci ildə tutduğu vəzifələrdən istefa verib.
O, 1990-cı ildə Azərbaycan SSR xalq deputatı və Naxçıvan MSSR xalq deputatı seçilib. 1991-ci ildə Heydər Əliyev Naxçıvan Muxtar Respublikası Ali Sovetinin sədri seçilib və Azərbaycan Respublikası Ali Soveti sədrinin müavini olub.
Heydər Əliyev 15 iyun 1993-cü ildə Azərbaycan Respublikası Ali Sovetinin sədri seçilib, 24 iyun isə Azərbaycan Respublikası Prezidentinin səlahiyyətlərini həyata keçirməyə başlayıb. 1993-cü və 1998-ci illərdə Heydər Əliyev Azərbaycan Respublikasının Prezidenti seçilib.
12 dekabr 2003-cü ildə Heydər Əliyev ABŞ-nin Klivlend Klinikasında vəfat edib. Ümumilli lider Bakıda, I Fəxri xiyabanda dəfn olunub.
