21 noyabr 1992-ci ildə ümummilli Lider Heydər Əliyevin sədrliyi ilə keçirilən konfrans zamanı Yeni Azərbaycan Partiyasının (YAP) yaradılması haqqında qərar qəbul edilib. Həmin konfransda, həmçinin partiyanın Proqram və Nizamnaməsi təsdiq olunub, Heydər Əliyev isə partiyanın Sədri seçilib. YAP-nin Proqramında irəli sürülmüş əsas vəzifələr sırasında bunlar qeyd olunmuşdur: dövlət müstəqilliyinin möhkəmləndirilməsi, demokratik, hüquqi, dünyəvi dövlətin qurulması, vətəndaşların dinc və firavan həyatının təmin edilməsi və s.
YAP 18 dekabr 1992-ci ildə Ədliyyə Nazirliyində qeydiyyata alınıb. Bu partiyanın qısa müddətdə Azərbaycan Respublikasının bütün bölgələrində rayon təşkilatları və özəkləri yaradılıb.
3 oktyabr 1993-cü ildə YAP-nin sədri Heydər Əliyev Azərbaycanın Prezidenti seçilmişdir. Bu tarixdən başlayaraq ölkənin siyasi həyatında partiyanın tutduğu mövqe möhkəmlənmişdir. 12 noyabr 1995-ci ildə keçirilən Parlament seçkilərində Milli Məclisə seçilən deputatların əsas hissəsi YAP-nin üzvləri olduğundan, bu partiya iqtidar partiyasına çevrilmiş, ona olan ümumxalq inamı bir daha təsdiq edilmişdir.
