Ölkə əhalisinin sayı ilin əvvəlindən 0,5% artaraq noyabrın 1-i vəziyyətinə 10 210 818 nəfərə çatıb. Bu barədə məlumat Dövlət Statistika Komitəsinin 14 dekabr tarixli hesabatında əks olunub.
Hesabata əsasən, əhalinin 52,9%-ini şəhər, 47,1%-ini kənd sakinləri təşkil edib, kişi və qadınların xüsusi çəkiləri isə dəyişməyərək eyni olub.
Cari ilin yanvar-oktyabr aylarında ölkə üzrə 103 502 uşaq dünyaya gəlib. Doğulan uşaqlar arasında oğlanların xüsusi çəkisi 52,8%, qızların xüsusi çəkisi isə 47,2% olub. Azərbaycanda 2 892 əkiz, 135 üçəm, 8 dördəm doğulub.
Əhalinin hər 1 000 nəfərinə 2021-ci ilin müvafiq dövrü ilə müqayisədə nikahların sayı 5,5-dən 6,2-yə qədər artıb, boşanmaların sayı isə azalaraq 1,7-dən 1,6-ya düşüb.
Bu ilin 10 ayı ərzində ölkədə 50 457 ölüm halı qeydə alınmışdır.
