Son günlərdə un bazarında qiymət artımı ilə bağlı məlumatlar yayımlanır. Məsələyə martın 18-də Antiinhisar və İstehlak Bazarına Nəzarət Dövlət Xidməti tərəfindən aydınlıq gətirilib.
Məlumatda bildirilir ki, dünyada baş verən iqtisadi və siyasi hadisələr nəticəsində ərzaqlıq buğdanın qiyməti artıb. Bununla belə, yerli un və un məhsulları satışı bazarında mövcud vəziyyətdən sui-istifadə hallarının və qiymətlərin əsassız olaraq dəyişilməsinin qarşısının alınması məqsədilə ciddi nəzarət tədbirləri həyata keçirilir. Artıq bir sıra bazar subyektlərinə öz qiymət siyasətinin əsaslandırılması üçün sorğular göndərilib.
Qeyd edək ki, Azərbaycanda ərzaqlıq buğdanın, unun və çörəyin qiyməti tariflər əsasında deyil, bazar iqtisadiyyatına uyğun olaraq tələb-təklif əsasında formalaşır.
Un istehsalçıları unun topdansatış qiymətləri, topdansatış mərkəzləri və məntəqələri, habelə iş vaxtı və əlaqə nömrələrinə dair məlumatları link vasitəsi ilə ala bilərlər.
Alıcılar sahibkarların qiymət manipulyasiyası halları ilə rastlaşdıqda (+99412) 599-76-00 telefon nömrəsi ilə və ya [email protected] elektron poçt ünvanı ilə əlaqə saxlaya bilərlər.
