Gəncə, Sumqayıt, Şəki və Şirvan Apellyasiya məhkəmələrinə yeni hakimlər təyin edilib. Bununla bağlı "Gəncə, Sumqayıt, Şəki və Şirvan Apellyasiya məhkəmələrinə hakimlərin təyini və vəzifədən azad edilməsi haqqında" layihələr Milli Məclisin bu gün keçirilən iclasında səsverməyə çıxarılaraq təsdiqlənib.
Sənədə əsasən, Şirvan Apellyasiya Məhkəməsinin hakimi Rafiq Musa oğlu Cəfərov vəzifəsindən azad edilərək Gəncə Apellyasiya Məhkəməsinin hakimi təyin olunub. Gəncə Ağır Cinayətlər Məhkəməsinin hakimi Nural Turab oğlu Əliyevin isə vəzifəsi dəyişdirilərək Gəncə Apellyasiya Məhkəməsinin hakimi təyin olunub.
Şəki Apellyasiya Məhkəməsinin hakimi Ayaz Akif oğlu Mahmudov vəzifəsindən azad edilərək Sumqayıt Apellyasiya Məhkəməsinin hakimi təyin edilib.
Rəhimli Lalə Elxan qızı Xətai Rayon Məhkəməsinin, Cabbarova Gülnar İnqilab qızı Qaradağ Rayon Məhkəməsinin, İsmayılov Azər İbrahim oğlu və Süleymanova Almaz Məhərrəm qızı Sumqayıt Şəhər Məhkəməsinin hakimi təyin olunublar.
Layihəyə əsasən, Sumqayıt Apellyasiya Məhkəməsinin hakimləri Quliyev Telman Osman oğlu və Tağızadə Gülnarə Fikrət qızı vəzifələrindən azad ediliblər.
Bundan əlavə, Səmədov Xəqani Hacı oğlu Gəncə Ağır Cinayətlər Məhkəməsinin hakimi, Mehdiyev Elçin Məhəmməd oğlu Şəki Rayon Məhkəməsinin hakimi təyin olunublar.
Həmçinin Gəncə Apellyasiya Məhkəməsinin hakimi Elçin İsgəndər oğlu Xasməmmədov, Şəki Rayon Məhkəməsinin hakimi İmanov Cahit Fehruz oğlu, Şirvan İnzibati Məhkəməsinin hakimi Həsənov Samir Firdovsi oğlu və Biləsuvar Rayon Məhkəməsinin hakimi Əhmədov Pərviz Tərlan oğlu Şirvan Apellyasiya Məhkəməsinin hakimi təyin olunublar.
