"Kanals.az" internet portalının təsisçisi və rəhbəri işləmiş Ələkbərov Sənan Məmməd oğlu 6 il müddətinə azadlıqdan məhrum edilib. Bu barədə 12 dekabr tarixində Report məlumat verib.
Belə ki, "Kanals.az" internet portalının təsisçisi və rəhbəri işləmiş S.Ələkbərov qəsdən qabaqcadan əlbir olan bir qrup şəxs halında zərərçəkmiş şəxslərin haqqında rüsvayedici məlumatlar yaymaq hədəsi ilə hədə-qorxu gələrək pul tələb edib. Məsələ ilə bağlı “hədə-qorxu ilə tələb etmə” maddəsi ilə cinayət işi başlanıb.
Müəyyən edilib ki, S.Ələkbərov G.Süleymanovanın rüsvayedici fotoşəkillərini özünə məxsus olan "Kanals.az" saytında və eyni adlı “youtube” internet səhifəsində yayacağı və işlədiyi işdən çıxartdıracağı hədəsi ilə ona hədə-qorxu gəlib. O, həmin məqsədlə 2021-ci ilin dekabr ayının ortalarında G.Süleymanovadan 1 000 manat tələb edib.
Bundan başqa, S.Ələkbərov tanışı,1981-ci il təvəllüdlü, Ağdam rayonunda doğulmuş Rüstəmov Teymur Hüseyn oğlu ilə qəsdən qabaqcadan əlbir olan bir qrup şəxs halında Yevlax şəhərində yerləşən “Zeytun 9” aptekinin satıcısı Misirxanova Esmira Elxan qızının hədə-qorxu ilə tələb etməklə əmlakını ələ keçirmək məqsədilə 2021-ci ildə qadının satıcı işlədiyi aptekə gələrək əlində olan “Samsung” markalı mobil telefonun videokamerası ilə gizli çəkiliş aparıb. O, E.Misirxanovadan “Amaril 400” adlanan dərman vasitəsini pulla aldıqdan sonra həmin çəkdiyi videogörüntüləri T.Rüstəmovun mobil telefonuna vatsap vasitəsilə göndərib. T.Rüstəmov 2022-ci ildə E.Misirxanovanın fəaliyyət göstərdiyi “Zeytun 9” aptekinə gələrək onun həmin aptekdə satılması qadağan edilmiş dərman vasitələrinin satışı ilə məşğul olmasını deyərək ondan 5 000 manat məbləğində pulu hədə-qorxu ilə tələb edib.
Bundan başqa, S.Ələkbərov Bərdə Regional Mədəniyyət İdarəsinin Yevlax şəhər nümayəndəliyində baş məsləhətçi vəzifəsində işləyən Məmmədov Rafiq Yaqub oğlunun pulunu ələ keçirmək məqsədilə özünə məxsus “Kanals.az” youtube internet səhifəsində “mədəniyyətsiz mədəniyyət işçiləri” adı ilə yayımladığı R.Məmmədovla aralarında baş vermiş mobil telefon danışığının səsyazısının həmin internet səhifəsindən silinməsi və sonuncunun barəsində Mədəniyyət Nazirliyinə müsbət fikirlər bildirməklə onu işdən çıxartdırmayacağı adı ilə 2022-ci ilin fevral ayının ortalarında R.Məmmədovdan xeyli miqdarda - 15 000 manat pulu hədə-qorxu ilə tələb edib.
S.Ələkbərovun barəsində Cinayət Məcəlləsin 182.2.1, 182.2.2, 182.2.4-cü maddələri ilə, T.Rüstəmovun barəsində isə 182.2.1-ci maddəsi ilə ittiham irəli sürülüb.
Şəki Ağır Cinayətlər Məhkəməsinin hökmü ilə S.Ələkbərov 6 il, T.Rüstəmov isə 5 il müddətinə azadlıqdan məhrum edilib.
