Azərbaycanda А4 formatlı ofis kağızı iki dəfə bahalaşıb. Bu haqda martın 28-də Qafqazinfo məlumat verib.
Belə ki, dəftərxana ləvazimatlarının satışı ilə məşğul olan bir çox yerdə məhsul yoxa çıxıb, olanlarda isə qiymət 4-5 manatdan 9-10 manata qalxıb. Qiymət artımına səbəb kimi yerli istehsalın olmaması və kağızın Rusiyadan gətirilməsi göstərilir.
Azərbaycana ötən il gətirilən 16 min tondan çox kağız və kartonun 97%-i, qəzet kağızının isə 100%-i Rusiyanın payına düşüb. Rusiya-Ukrayna arasındakı gərginliyin ölkəmizin kağız məhsulları ilə təminatına təsiri barədə bu sahənin mütəxəssisləri Reporta danışıb.
Qanun nəşriyyatının rəhbəri Şahbaz Xuduoğlunun söylədiyinə əsasən, son bir ay ərzində ölkədə kağızın qiyməti bir neçə dəfə artıb.
“Əvvəl kağızın tonu 1 380 dollar idi, hazırda isə qiymət 2 100 dollar təşkil edir. Hazırda bizdə çox məhdud çeşidlərdə kağızlar qalıb. Lazım olan çeşidlər artıq bazarda yoxdur”, - deyə o bildirib.
O qeyd edib ki, Rusiyaya alternativ olaraq Finlandiya, İndoneziya, Almaniyadan kağızlar gətirilir. Lakin Avropadan kağız daha baha qiymətə gəlir.
“Çin də meşə məhsullarını Rusiyadan alır. Artıq bu baxımdan problem var. Türkiyə də bu məhsulları, əsasən, Rusiyadan və Ukraynadan alırdı. Onlarda da bəlli səbəblərdən kağız qıtlığı var. Ümumiyyətlə, dünya bazarında hazırda kağız qıtlığı var", - Ş.Xuduoğlu qeyd edib.
Rusiyadan Azərbaycana kağız gətirən firmanın nümayəndəsi Mətanət Namazova Rusiya bazarındakı qiymət artımının Azərbaycana da təsir göstərəcəyini bildirib: “Rusiya zavodlarından əvvəl bizə 2-3 aylıq qiymət deyilirdisə, hazırda günlük qiymət cədvəli verilir. Çünki onlarda həm rublun dollara qarşı məzənnəsi dəyişir, həm də qiymətlər fərqli olur. Biz ancaq mal oradan çıxanda qiymətin nə qədər artdığını bilirik”.
