Qəsdən adam öldürməkdə təqsirləndirilən Vüsal Salayevə hökm oxunub. Bu barədə dekabrın 3-də Oxu.az xəbər yayıb.
Hökmə əsasən, o, 16 il 6 ay müddətinə azadlıqdan məhrum edilib. Hadisə 30 may 2021-ci il tarixində Xırdalan bazarında qeydə alınıb.
Belə ki, Vüsal Salayev Xırdalan bazarında məhsullarının daşınması və satışı ilə məşğul olarkən meyvə-tərəvəz satışı ilə məşğul olan keçmiş sinif yoldaşı Sərdar Həsənovu görüb. Sərdar hələ məktəb illərində onun haqqında “cinsi azlıq”lara mənsub olması barədə şəxsiyyətini aşağılayan şayiələr yayıb, son bir neçə ayda bazara gəlib-gedərkən zərərçəkmiş eyni sözləri təkrarlayıb.
Daha sonra Vüsal keçmiş sinif yoldaşını öldürmək qərarına gəlib. Sərdar tualetdə olarkən Vüsal onun üzərinə hücum edərək “Kalaşnikov” avtomatına məxsus süngü bıçaqla zərərçəkmişin bədəninin müxtəlif nahiyələrinə çoxsaylı zərbələr endirib. Nəticədə Sərdar Həsənov aldığı xəsarətlərdən hadisə yerində ölüb.
Vüsal ifadəsində bildirib ki, Sərdar məktəb dövründə onun barəsində dediklərini 35 il keçməsinə baxmayaraq, hələ də söyləməyə davam edib və buna görə də onu öldürüb.
