Bu gün Ukrayna Azərbaycanlıları Radasının ofisi – Azərbaycan Evində Kiyev sakinləri üçün yardım aksiyası təşkil edilib. Bu barədə martın 24-də Diasporla İş üzrə Dövlət Komitəsindən məlumat verilib.
Aksiya zamanı Kiyevdəki aztəminatlı ailələrə ərzaq məhsulları, tibbi yardım ləvazimatları, geyim əşyaları və digər zəruri məhsullar paylanılıb.
Ukrayna ilə Rusiya arasında gərginliyin başlamasından sonra Azərbaycan Evində mütəmadi yardım aksiyaları keçirilir. Təxminən yarım ay ərzində hər gün 250-300 nəfər Azərbaycan Evinə gələrək ehtiyacı olan məhsulları əldə edir.
Qeyd olunub ki, Ukrayna Azərbaycanlıları Radası fevralın 24-dən etibarən minlərlə soydaşımızın təxliyəsini təşkil edərək, onların təhlükəli ərazilərdən çıxarılmasını və sərhədyanı ölkələrə keçməsini təmin edib.
