Aprel ayından etibarən Azərbaycan-İsrail birgə Təlim Proqramı çərçivəsində aqronom və fermerlər üçün xüsusi təlimlərə başlanılacaq. Bu barədə 29 mart tarixində Kənd Təsərrüfatı Nazirliyi məlumat verib.
Məlumatda bildirilib ki, təlim kursunu İsraildən dəvət olunan 4 mütəxəssis idarə edəcək. Sözügedən təlimlər tumlu və çəyirdəkli meyvələrin (alma, armud, gilas, nektarin, şaftalı və gavalı) becərilməsi, aqrotexniki qulluq və digər mövzuları əhatə edəcək. Bundan əlavə, təlim modulları xəstəlik və zərərvericilərlə mübarizə, bitki mühafizə vasitələri və aqrokimyəvi maddələrin düzgün tətbiqinə həsr olunub. Həmçinin fermerlər torpaqdan davamlı istifadə qaydaları və texnikalardan düzgün istifadə qaydaları haqqında məlumatlandırılacaqlar.
Ümumilikdə 12 gün ərzində hər gün 3 saatlıq nəzəri və praktiki təlimlər təşkil olunacaq. Qeyd olunub ki, nəzəri təlimlər Meyvəçilik və Çayçılıq Elmi-Tədqiqat İnstitutunda, praktiki təlimlər isə institutun və fermerlərin təsərrüfat sahələrində keçiriləcək.
Təlim kursu ödənişlidir.
Təlimdə iştirak etmək istəyənlər [email protected] poçt ünvanına və ya +994 77 308 08 28 əlaqə nömrəsinə müraciət edə bilərlər.
