Gəncədə istintaq təcridxanasında intihar hadisəsi baş verib. Bu haqda dekabrın 8-də APA xəbər yayıb.
Hadisə Gəncə şəhər 2 saylı İstintaq Təcridxanasında qeydə alınıb. Orada saxlanılan məhkum, Tovuz rayon sakini Əhmədov Maksim Mehdi oğlu damarını şüşə ilə kəsərək özünü öldürüb.
İlkin məlumata görə, məhkum bu addımı bir neçə gün əvvəl çıxarılan məhkəmə hökmünə etiraz olaraq atıb. Faktla bağlı araşdırmalara başlanılıb.
Qeyd edək ki, 1981-ci il təvəllüdlü Maksim Mehdi oğlu Əhmədov qətl törətdiyinə görə həbs olunub. O, ötən ilin dekabr ayında Tovuzun İbrahimhacılı kəndində 1964-cü il təvəllüdlü Ənvər Alırzayevi və qardaşı, 1960-cı il təvəllüdlü Fərman Alırzayevi bıçaqlayıb. Ənvər Alırzayev ölüb.
Məhkəmənin hökmü ilə M.Əhmədova 18 il 6 ay müddətinə həbs cəzası verilmişdi.
