Ötən il Naxçıvanda sənaye sahəsinə 36 milyon manatdan çox investisiya yatırılıb. Bu barədə 12 yanvar tarixində APA Naxçıvan Muxtar Respublikası İqtisadiyyat Nazirliyinə istinadən məlumat verib.
“Sənaye ili” çərçivəsində məişət və kənd təsərrüfatı avadanlıqları, çaxır, dondurma, mebel, ayaqqabı, plastik qapı-pəncərə istehsalı sahələri olmaqla ümumilikdə 16 layihə üzrə işlər başa çatdırılıb, 101 yeni iş yeri açılıb.
Məlumata əsasən, Naxçıvan Muxtar Respublikası İqtisadiyyat Nazirliyinin tabeliyində fəaliyyət göstərən Sahibkarlığın İnkişafı Fondu sənaye məhsullarının istehsalına və emalına xidmət edən 288 layihənin maliyyələşdirilməsinə 112 milyon 727 min 872 manat, təkcə cari ilin ötən dövrü ərzində isə 4 milyon 993 min manat həcmində güzəştli kredit verilib.
Qeyd olunub ki, Naxçıvanda yeni Duz İstehsalı Müəssisəsinin, “Naxçıvan Xalça və İplik İstehsalı Müəssisəsi” Məhdud Məsuliyyətli Cəmiyyətinin, “Ləzzət Qida Sənaye” Məhdud Məsuliyyətli Cəmiyyətində salfet və araq istehsalı sahələrinin yaradılması davam etdirilməkdədir.
