1918-ci ildə 12-14 minlik Osmanlı əsgərlərindən ibarət Qafqaz İslam Ordusu Nuru Paşanın komandanlığı altında Azərbaycanda bolşevik-daşnak hakimiyyətinə qarşı mübarizə aparmaq məqsədi ilə yola çıxdı. Bu orduya sonralar azərbaycanlılar və Dağıstan müsəlmanları da qatılmışdı.
Qafqaz hərəkatı başlayandan sonra Nuru Paşa ordunu quzey və güney qruplarına ayırdı. Güney qrupu Göyçay, Yevlax, Ucar, Kürdəmir, Hacıqabul və Ələt istiqamətində yola davam etdi.
22-31 iyul 1918-ci ildə ordunun güney qrupunun yollandığı ərazilərdə yaşanan döyüşlərdə Kürdəmir bölgəsindən Bakı istiqamətinə gedən hərəkat zamanı Sabirabad rayonunun Qəzli kəndi ətrafında 2 türk əsgəri şəhid olub, 1-i isə yaralanıb. Onların ikisinin cəsədi yerli əhali tərəfindən Qəzli kəndinin ərazisindən keçən Kür çayının sol sahilində dəfn edilib, yaralı əsgər isə kəndə gətirilib.
Lakin rus-erməni bolşevik qüvvələri bundan xəbər tutublar. Onlar yaralı əsgəri özləri ilə aparıb, öldürürlər və həmin əsgərin cəsədini yerli sakinlərə vermək istəmirlər. Kənd əhalisi rus-erməni qoşununa qızıl təklif edərək, əvəzinə əsgərin cəsədini götürürlər. Yerli sakinlər türk əsgərinin cəsədini kəndin mərkəzində dəfn edirlər. O gündən bu məzarlıqlar kənd əhalisi tərəfindən mühafizə olunur.
Şair, publisist-araşdırmaçı Ağazal Əkbər kəndin yaşlı nümayəndələrindən məlumatlar toplayıb və bu məzarlıq haqqında Türkiyənin Azərbaycandakı səfirliyinə müraciət edib. Türkiyə səfirliyinin nümayəndələri Qəzli kəndinə gələrək, buradakı türk məzarlığı haqqında olan məlumatları təsdiqləyiblər. Bunun sayəsində türk məzarlığı 2017-ci ildə bərpa edilib.
Sərxan Carçı. Cümhuriyyət xilaskarları, əmanət məzarlar.
https://tarix.konspekt.az/maraqli/tarixi-meqaleler/3724-100-yashli-turk-mezarligi.html
[gallery link="file" columns="2" size="full" ids="93417,93418"]
