Şəki Xan məscidi kompleksində bərpa işləri çərçivəsində aparılan qazıntılar zamanı tapılan qəbrin Şəki xanına məxsus olduğu təsdiqlənib. Bu barədə İnsanoid dekabrın 2-də Qafqazinfo-ya istinadən xəbər verir.
Bunu Avstriya, Böyük Britaniya, Estoniya və Türkiyədə aparılan tədqiqatlar və genetik analizlərin nəticələri, AMEA Arxeologiya, Etnoqrafiya və Antropologiya İnstitutunun elmi rəyi deməyə əsas verir.
Belə ki, 2021-ci ilin may ayından etibarən Heydər Əliyev Fondu Şəki Xan məscidi kompleksində bərpa işlərinə başlayıb.
Bərpa işləri zamanı mehrabın altı qazılarkən oradan böyük ölçülü sal daşlar çıxıb. Qazıntı işləri nəticəsində həmin hissədən qəbir aşkar olunub.
Qəbirdən 52 muncuq və tunc təsbeh başlığının tapılması dəfn olunanın yüksək dini və ya dövlət statuslu şəxs olması ehtimalını yaradırdı. Bu ehtimallar, eləcə də Salman Mümtazın əsərindəki Şəki xanı Məhəmmədhüseyn xan Müştağın Xan məscidinin mehrabının altında dəfn olunmasına dair qeydlər əsas götürülməklə aşkarlanan tapıntılar üzrə yoxlamalar aparılmışdı.
Aşkar olunan skeletdən nümunələr götürülmüş, radiokarbon və genetik analizlər aparmaq üçün Böyük Britaniyanın Oksford Universitetinin laboratoriyasına göndərilmişdi. Laborator analizlərin nəticəsində aşkar edilən qəbrin Şəki xanı Məhəmmədhüseyn xana aid olduğu məlum olub.
