Şəmkirdə 14 yaşlı qız ərə verilir. Bu barədə noyabrın 15-də Lent.az-a Azərbaycan Uşaq Birliyinin sədri Kəmalə Ağazadə məlumat verib.
Onun sözlərinə görə, Şəmkir rayonunda 14 yaşlı qız 26 yaşlı əmisi oğlu ilə nişanlanıb.
Daxili İşlər Nazirliyi hadisəyə münasibət bildirib. Polis əməkdaşları 14 yaşlı qızla söhbət aparıblar. Qız ona elçi gəldiyini təsdiqləyib. Onun sözlərinə görə, yaxın zamanlarda nişan olacaq. Toyun isə 18 yaşından sonra baş tutacağını deyib. Qızın və oğlanın valideynləri polisə dəvət olunaraq, onlarla profilaktiki söhbət aparılıb. Onlara bildirilib ki, toyun yalnız qızın 18 yaşından sonra keçirilməsi mümkündür.
Qeyd edək ki, qızın 15 yaşı yanvar ayında tamam olacaq.
