Sentyabr şəhidi Vadim Qocayevin yeni doğulan körpəsi xəstəxanadan evə buraxılıb. Bu barədə noyabrın 29-da Report xəbər verib.
Körpənin evə yola salınması mərasimində Müdafiə Nazirliyinin rəsmiləri, şəhidin döyüş yoldaşları və ailə üzvləri iştirak ediblər. Şəhidin övladı noyabr ayının 25-də doğulub. Körpənin çəkisi 2 kiloqram 900 qramdır.
Qeyd edək ki, Qocayev Vadim Alik oğlu 1997-ci il yanvarın 10-da Qobustan rayonunun Sündü kəndində anadan olub. O, 2022-ci il sentyabrın 12-də Ermənistan silahlı qüvvələrinin Azərbaycanla sərhəddə törətdiyi genişmiqyaslı təxribatların qarşısını alarkən şəhid olub.
Şəhidin atası Alik Qocayev oğlunun şəhid olması xəbərini eşidəndən sonra ürək tutmasından vəfat edib.
Vadim Qocayev Vətən müharibəsi zamanı Azərbaycan torpaqlarının erməni işğalından azad olunması uğrunda gedən döyüşlərdə də iştirak edib. Müharibədən sonra Prezidentin sərəncamları ilə “İgidliyə görə” və “Cəbrayılın azad olunmasına görə” medalları ilə təltif edilib.
