Bu günədək fermerlər tərəfindən kondisiya çəkidə 275 327 ton pambıq yığılaraq tədarük məntəqələrinə təhvil verilib. Bu barədə 22 noyabr tarixində Kənd Təsərrüfatı Nazirliyi məlumat verib.
Hazırda respublika üzrə pambığın orta məhsuldarlığı 26,41 sent/ha təşkil edir. Ağcabədi, Ağdam, Beyləqan, Bərdə, İmişli, Saatlı, Tərtər, Yevlax və Zərdab rayonlarında orta məhsuldarlıq göstəricisi ümumrespublika göstəricisindən yüksəkdir.
Artıq birinci yığım başa çatıb, bəzi bölgələrdə pambığın ikinci yığımı başlayıb.
Bu il Azərbaycanın 16 rayonunda ümumilikdə 100 min hektardan artıq sahədə pambıq əkini aparılıb. Ən çox pambıq Saatlı, Ağcabədi, Sabirabad və Bərdə rayonlarının ərazisində əkilib. Bu rayonların ərazisində pambıq əkinlərinin sahəsi 11 min hektardan çoxdur. Ümumilikdə respublika üzrə pambıq əkini sahələrinin 45 faizdən çoxu bu 4 rayonun payına düşür.
Qeyd olunub ki, məhsul subsidiyasının məbləği hər tona görə 100 manatdan 170 manata qaldırılıb. Ötən il 1-ci sort pambığın 1 tonu fermerlərdən 700 manata alınırdısa, bu il təhvil verilən eyni sort pambığın 1 tonuna görə fermerlərə 800 manat ödənilir.
