Ucarda 16 yaşlı qızın toyunda iştirak edən polis əməkdaşı ilə bağlı araşdırma aparılır. Bu haqda məlumatı Oxu.az bu gün, 23 dekabr tarixində verir.
Belə ki, 17 dekabr rayonun Qaracallı kəndində baş tutan toy mərasiminin görüntüləri sosial şəbəkələrdə yayılıb. Məclisdə Elçin Neymanov adlı polis əməkdaşı da mülki geyimdə iştirak edib.
Məsələ ilə bağlı DİN-in Mətbuat Xidmətinin Şirvan regional qrupunun baş inspektoru, polis kapitanı Nizam Həmidov bildirib ki, həmin toy məclisində iştirak edən Ucar Rayon Polis Şöbəsinin əməkdaşı E.Neymanov barəsində də xidməti yoxlamalar aparılır:
“Azyaşlının erkən nikaha daxil olması ilə bağlı Ucar Rayon Polis Şöbəsində araşdırmalara başlanılıb. Aparılan araşdırmaların nəticəsindən asılı olaraq, məsələyə hüquqi qiymət veriləcək”.
Qeyd edək ki, İnsanoid daha öncə 16 yaşlı qızın həmkəndlisi Qəribxan Lətifova ərə verilməsi haqda məlumat verib.
