İmişli rayon İcra Hakimiyyətinin sabiq başçısı Vilyam Hacıyevin bəraət istəməsi barədə verdiyi apellyasiya şikayəti təmin olunmayıb. Bu barədə Azxəbər məlumat yayıb.
Vilyam Hacıyevin həyat yoldaşı Cülyetta İbrahimova və oğlu Məhəmməd Hacıyevin adına olan əmlakların üzərinə qoyulmuş həbsin götürülməsi barədə verdikləri şikayətlər də təmin edilməyib.
Üzərinə həbs qoyulmuş əmlakların tam siyahısı:
- Həyat yoldaşının adına rəsmiləşdirilmiş Bakıda Teymur Əliyev küçəsində yerləşən fərdi ev (orta bazar dəyəri - 1 852 000 manat);
- Həyat yoldaşının adına rəsmiləşdirilmiş Bakıda Sabit Rəhman küçəsində yerləşən mənzil (orta bazar dəyəri - 275 000 manat);
- Həyat yoldaşının adına rəsmiləşdirilmiş Xırdalanda 4 mənzil (orta bazar dəyərləri 67 000, 86 000, 74 000, 65 000 manat);
- Həyat yoldaşının adına rəsmiləşdirilmiş Nardaran-Ləhiş yolunun 300 metrliyində yerləşən ev (orta bazar dəyəri 2 626 000 manat);
- Həyat yoldaşının adına rəsmiləşdirilmiş "BMW X5" markalı, "90-CM-200" dövlət qeydiyyat nömrəli minik avtomobili (orta bazar dəyəri 22 000 manat)
- Oğlunun adına rəsmiləşdirilmiş "Land Rover" markalı, "90-KH-900" dövlət qeydiyyat nömrəli minik avtomobili (orta bazar dəyəri 126 000 manat)
- Həyat yoldaşının təsisçisi olduğu “Xəzər-222” MMC-nin adına sənədləşdirilmiş “BMW 740-İ”, “Bentley Continental GT” markalı minik avtomobilləri (orta bazar dəyərləri 33 000, 118 000 manat).
Qeyd edək ki, Bakı Ağır Cinayətlər Məhkəməsinin hökmü ilə Vilyam Hacıyev 12 il müddətinə azadlıqdan məhrum edilib.
