Dəniz suyunun Kürə qarışmasının qarşısını almaq məqsədilə Neftçalada çayın deltasında bəndbərkitmə işləri ilə yanaşı, maneələr də yaradılır. Bu haqda dekabrın 1-də Report xəbər yayıb.
Artıq 15 günə yaxındır ki, rayonun Mayak kəndi ərazisindən keçərək Xəzər dənizinə qovuşan Kür çayının hər iki qolunun deltasında bəndbərkitmə işləri aparılır.
Kürün qarşısında bənd müəyyən hündürlüyə qədər bərkidiləcək, sonra çayın suyu həmin bəndin üzərindən axaraq Xəzər dənizinə töküləcək. Bununla da yay aylarında çayda suyun səviyyəsi aşağı olsa da, dəniz suyunun Kürə qarışmasının qarşısı alınacaq.
Hazırda son günlər intensiv yağış yağdığından Kürün deltasında işlər dayandırılıb. Hava şəraiti imkan verən kimi işlər yenidən davam etdiriləcək.
