Azərbaycan Xarici İşlər Nazirliyi Fransa Senatında Azərbaycan əleyhinə qəbul edilmiş qətnaməyə dair şərh bildirib. Bu barədə 16 noyabr tarixində Nazirlik məlumat verib.
“15 noyabr 2022-ci il tarixində Fransa Senatında qəbul edilmiş “Azərbaycana qarşı sanksiyaların tətbiqi və onun Ermənistan ərazisindən dərhal geri çəkilməsi, 9 noyabr 2020-ci il tarixli atəşkəs razılaşmasına riayət etməsi tələbi və iki ölkə arasında dayanıqlı sülhün bərqərar olmasına yönəlmiş bütün təşəbbüslərin təşviq edilməsi” adlı qətnamə tamamilə həqiqətdən uzaqdır, yalan və iftira dolu müddəaları əks etdirir və açıq təxribat xarakteri daşımaqla Azərbaycanla Ermənistan arasında münasibətlərin normallaşması prosesinə xələl gətirilməsinə xidmət edir”, - şərhdə bildirilib.
Məlumatda qeyd olunub ki, Fransanın növbəti dəfə qərəzli və birtərəfli siyasi mövqeyi bariz şəkildə nümayiş olundu.
“Fransa Senatı tərəfindən qəbul edilmiş bu növbəti qətnaməni qətiyyətlə rədd edirik”, - məlumatda qeyd olunub.
