Bakıda son illər velosiped və skuter istifadəsinin artması ilə yanaşı, velozolaqların avtobus dayanacaqları ilə kəsişdiyi ərazilərdə təhlükəsizlik məsələsi də daha çox diqqət çəkməyə başlayıb.
Şikayət TV xəbər verir ki, xüsusilə sərnişinlərin avtobusa minib-düşdüyü məntəqələrdə yaranan vəziyyət həm piyadalar, həm də velosiped və skuter sürücüləri üçün risk yaradır.
Müşahidələr göstərir ki, avtobus dayanacaqda sərnişinləri mindirib-endirdiyi vaxt bəzi velosiped və elektrik skuteri sürücüləri hərəkəti dayandırmadan velozolaqla yollarına davam edirlər. Bu isə avtobusdan enən və ya avtobusa minmək istəyən sərnişinlərlə toqquşma ehtimalını artırır. Xüsusilə uşaqlar, yaşlı insanlar və hərəkət məhdudiyyətli şəxslər üçün bu cür vəziyyət ciddi təhlükə hesab olunur.
Digər problem isə bəzi sürücülərin avtobusun dayanacaqda olduğunu gördükdə toqquşmadan yayınmaq üçün avtomobillərin hərəkət zolağına çıxmasıdır. Bu zaman həm velosipedçi, həm də avtomobil sürücüləri üçün qəza riski artır və yol hərəkətinin təhlükəsizliyi pozulur. Mütəxəssislər bildirirlər ki, dünyanın müxtəlif şəhərlərində bu problemin qarşısını almaq üçün fərqli şəhərsalma həlləri tətbiq olunur. Sakinlər məsul qurumlar tərəfindən problemin nəzarətə götürülməsini və tezliklə aradan qaldırılmasını xahiş edirlər.
