Penitensiar xidmətin yeni rəisi Sahib Rzayev kimdir? – 17 il FHN-də çalışıb
Azərbaycanın penitensiar sisteminə yeni rəhbər təyin olunub. Prezident İlham Əliyevin imzaladığı sərəncama əsasən, Sahib Cəlil oğlu Rzayev ədliyyə nazirinin müavini – Penitensiar xidmətin rəisi vəzifəsinə gətirilib.
Insanoid.com xəbər verir ki, yeni təyin olunan Sahib Rzayev uzun illər hüquq-mühafizə və dövlət idarəetmə orqanlarında rəhbər vəzifələrdə çalışıb.
Sahib Rzayev kimdir?
Sahib Cəlil oğlu Rzayev 1977-ci ildə anadan olub.
O, 2001-ci ildə Bakı Dövlət Universitetinin hüquqşünaslıq ixtisası üzrə bakalavr pilləsini bitirib. 2011-ci ildə isə həmin universitetdə beynəlxalq hüquq ixtisası üzrə əlavə təhsilini fərqlənmə ilə başa vurub.
Rzayev əmək fəaliyyətinin ilk illərində daxili işlər orqanlarında çalışıb. O, 2006-cı ilədək Daxili İşlər Nazirliyinin sistemində müstəntiq vəzifəsində işləyib.
2006-cı ildə Fövqəladə Hallar Nazirliyinə keçən Rzayev burada 17 il fəaliyyət göstərib. 2006–2023-cü illərdə FHN-də müxtəlif rəhbər vəzifələrdə, o cümlədən şöbə, idarə və baş idarə rəisi vəzifələrində çalışıb.
2025-ci ilin yanvarında Ədliyyə Nazirliyinin İstintaq idarəsinin rəis müavini təyin edilib.
Həmin il iyulun 23-də isə ədliyyə naziri Fərid Əhmədovun əmri ilə İstintaq idarəsinin rəisi vəzifəsinə yüksəlib.
Beləliklə, Rzayev Ədliyyə Nazirliyinin sistemində fəaliyyətə başlamasından təxminən bir il doqquz ay sonra nazir müavini və ölkənin Penitensiar xidmətinin rəhbəri vəzifəsinə təyin olunub.
Sahib Rzayev kimi əvəzləyib?
Penitensiar xidmətin əvvəlki rəisi Mirsaleh Miradil oğlu Seyidov olub.
O, 10 iyul 2023-cü ildə Prezidentin sərəncamı ilə ədliyyə nazirinin müavini – Penitensiar xidmətin rəisi təyin edilmişdi. Həmin ilin noyabrında ona ədliyyə general-mayoru ali xüsusi rütbəsi verilmişdi.
Seyidov uzun illər penitensiar sistemdə çalışıb. O, müxtəlif dövrlərdə istintaq təcridxanasında rəhbər vəzifələr tutub, 15 və 10 saylı cəzaçəkmə müəssisələrinə, daha sonra Penitensiar xidmətin Əməliyyat-rejim idarəsinə rəhbərlik edib.
