Avropa Parlamentinin Saxarov adına “Fikir azadlığı” Mükafatının 2023-cü ildəki sahibi açıqlanıb. Bu barədə 19 oktyabr tarixində APA məlumat verib.
Bildirilib ki, bu il mükafata Məhsa Əmini və İrandakı Qadın, Həyat, Azadlıq Hərəkatı layiq görülüb.
Xatırladaq ki, Məhsa Əmini ötən il sentyabrın 13-də İranın Əxlaq Polisi tərəfindən saxlanılıb. O, təcridxanaya aparılandan bir müddət keçmiş komaya düşüb və 3 gün sonra - sentyabrın 16-da xəstəxanada ölüb. Məhsa Əmininin ölümü ilə əlaqədar ötən ilin sentyabrında İranda başlayan ümummilli etirazlar aylarla davam edib. Etirazların təhlükəsizlik qüvvələri tərəfindən yatırılması nəticəsində 500-dən çox adamın öldürüldüyü, 22 mindən çox adamın saxlanıldığı bildirilib.
