Ermənistanda keçiriləcək Avropa çempionatında iştirak edəcək Azərbaycan ağırlıqqaldıranları İrəvana çatıblar. Bu barədə Report 13 aprel tarixində xəbər verib.
Bu barədə yarışa hazırlıq üzrə Təşkilat Komitəsinin sədri Arayik Arutyunyan jurnalistlərə açıqlama verib.
O bildirib ki, İrəvana 12 nəfərlə gələn nümayəndə heyəti təhlükəsizlik baxımından açılış mərasiminə qatılmayacaq: "Əlavə təhlükəsizlik zəmanəti istədilər, biz də təmin etdik. İdmanda münaqişəli ölkələrdən komandaların qəbulu adi təcrübədir. Ermənistan və Azərbaycan da Xorvatiya, Kosovo və digər ölkələr kimi, Avropa Ağırlıqqaldırma Federasiyasının üzvləridir. Azərbaycan Avropa çempionatında iştirak üçün ərizə verə bilərdi və bunu da etdi".
Azərbaycan nümayəndə heyətini Zvartnots hava limanında gücləndirilmiş polis dəstəsi qarşılayıb, xüsusi təyinatlılar də orada olub.
Avropa çempionatında Azərbaycanın 4 ağırlıqqaldıranı qüvvəsini sınayacaq.
