Avropada təyyarələrin partladılacağı ilə bağlı saxta həyəcan dalğası: 30-a yaxın reys təhdid alıb.
İnsanoid.com Xarici KİV-ə istinadən xəbər verir ki, Avropanın bir sıra ölkələrində təyyarələrə bomba yerləşdirilməsi ilə bağlı anonim təhdidlər qeydə alınıb. Nəticədə qırıcı təyyarələr havaya qaldırılıb, bəzi reyslər başqa hava limanlarına yönləndirilib.
Çexiya polisi noyabrın 6-da Praqa hava limanına gələn və oradan uçan doqquz təyyarənin bomba təhdidləri ilə əlaqədar yoxlanıldığını bildirib. Təhdidlər Danimarka, İspaniya və Böyük Britaniyadan gələn, eləcə də Niderland, Kipr, Rumıniya, İtaliya və Böyük Britaniyaya uçan təyyarələrə ünvanlanıb. Noyabrın 5-də Praqaya istiqamətlənən daha dörd təyyarə də oxşar təhdidlər alıb. Bütün təyyarələr təhlükəsiz eniş edib, yoxlamalar zamanı partlayıcı maddə aşkarlanmayıb. Məlumatların anonim elektron poçt ünvanlarından göndərildiyi bildirilir.
Eyni gün Avropanın müxtəlif ölkələrində təxminən 30 aviareys bomba təhdidləri ilə üzləşib. İtaliya, Fransa və Bolqarıstan qırıcı təyyarələri havaya qaldırıb, bir neçə sərnişin təyyarəsi alternativ hava limanlarına yönləndirilib.
İlk qeydə alınan hadisə Dublindən Romaya uçan "Aer Lingus" aviaşirkətinin reysi olub. Təyyarə Fransadakı Evrö hərbi bazasına endirilib. Madrid, Kopenhagen və Londondan Sofiyaya uçan üç "Ryanair" təyyarəsi də bomba təhdidləri alıb. Onlardan biri Plovdivə yönləndirilib, digərlərini isə Bolqarıstan qırıcıları müşayiət edib.
Bundan başqa, Varşava-Brüssel marşrutu ilə hərəkət edən "LOT" təyyarəsi təhlükəsiz eniş etdikdən sonra yoxlanılıb. Milandan Varşavaya uçan "Wizz Air" reysi Vyanaya yönləndirilib. Helsinkidən havaya qalxan iki "Finnair" təyyarəsi isə Romaya və Vyanaya enib. Milandan Buxarestə uçan təyyarənin sərnişinləri enişdən sonra təxliyə edilib və hava gəmisi yoxlanılıb. Belqrad-Buxarest marşrutu üzrə uçan "Air Serbia" və Afina-Vyana reysi ilə hərəkət edən "Aegean Airlines" təyyarələri də təhdidlərdən sonra yoxlamadan keçirilib.
"Reuters" agentliyinin məlumatına görə, Korkdan Londona uçan reys və Buxarestdə aralıq eniş etməklə Təl-Əvivə gedən təyyarə də təhdid alıb. Madriddə "Air Europa" və "Iberia" aviaşirkətlərinin təyyarələri yoxlanılıb. Parisə uçan reyslərdən biri isə uçuş-enmə zolağına çıxmazdan əvvəl saxlanılıb.
Təhdid məktublarının bəzilərində göndərənlər özlərini Rusiyada ekstremist təşkilat kimi tanınan və qadağan edilmiş "Kişi dövləti" hərəkatının üzvləri kimi təqdim ediblər. Onlar "feminist rejimə" qarşı olduqlarını bildirərək partlayışlarla hədələyiblər. İtaliya hava limanlarına göndərilən məktublardan birinin mətnini ANSA agentliyi yayıb. Məktub "Partlayış 60 dəqiqə ərzində baş verəcək. Bu gün səmanız qırmızıya boyanacaq" sözləri ilə bitib.
"Inpact" təşkilatının təsisçisi Lu Osborn AFP-yə bildirib ki, hələlik bu hərəkatın Rusiya hakimiyyəti ilə əlaqəsinin olub-olmadığı məlum deyil. AFP də təşkilatla təhdid məktublarının müəllifləri arasında əlaqəni təsdiqləyə bilməyib. Avropalı müstəntiqlər də təhdidlərin arxasında kimin dayandığını və bütün məktubların eyni mənbədən göndərilib-göndərilmədiyini müəyyənləşdirməyiblər.
"Kişi dövləti" hərəkatının qurucusu Vladislav Pozdnyakov isə təşkilatla əlaqəsinin 2019-cu ildən bəri olmadığını bildirib. O, Avropa ölkələrində bu adla təxribat törədənlərin hərəkatın adından öz maraqları üçün istifadə etdiyini iddia edib.
