ABŞ-də ölüm cəzasının tətbiqi ilə bağlı son illərin ən nadir hadisələrindən biri qeydə alınıb. Ölkə tarixində son 16 ildə ilk dəfə olaraq, bir gün ərzində üç fərqli ştatda ölüm hökmü eyni vaxtda yerinə yetirilib. Aktlar Florida, Alabama və İndiana ştatlarında qeydə alınıb.
Floridada 2004-cü ildə 75 yaşlı Ceki Melounu öldürdüyünə görə məhkum edilmiş 64 yaşlı Cessi Qvardodo edam edilib. O, qadının evinə daxil olaraq ona ölümcül bıçaq xəsarətləri yetirib, daha sonra isə zinət əşyaları və pul oğurlayıb. Edamdan əvvəl Qvardodo mərhumun ailəsindən və öz qohumlarından üzr istəyib.
Alabamada 54 yaşlı Maykl Teylora ölümcül inyeksiya edilib. 1991-ci ildə onun 19 yaşı olarkən, soyğunçuluq zamanı o, 83 yaşlı İvan Muru və onun 79 yaşlı həyat yoldaşı Lüsili metal çubuqla döyüb. Hər ikisi aldıqları xəsarətlərdən dünyasını dəyişib.
İndianada 2010-cu ildə rəfiqəsinin iki uşağının ölümü ilə nəticələnən evi yandırmaqda təqsirli bilinən 50 yaşlı Ceffri Vayshayt edam olunub. O, günahını etiraf etsə də, vəkilləri ölüm hökmünün ömürlük həbslə əvəz olunmasını xahiş ediblər. Ştatın qubernatoru Mayk Braun əfv xahişini rədd edib.
ABŞ-də eyni gündə üç ştatda üç nəfərin edam edilməsi nadir hadisə olaraq qalır. Sonuncu dəfə belə hal 2010-cu ildə baş verib.
