Serbiya Hava Yolları (Air Serbia) Moskvaya uçan təyyarələrindən birinin sərnişinlərdən biri ilə bağlı təhlükəsizlik yoxlamasının aparılması zərurəti yaranması səbəbindən Belqrada qaytarıldığını açıqlayıb. Bu barədə Serbiyanın Radio və Televiziya Qurumu (RTS) məlumat yayıb.
Serbiyanın Nova portalının məlumatına görə, təyyarənin göyərtəsində Serbiyanın keçmiş kəşfiyyat rəhbəri Aleksandr Vulin, "Serbiyaqaz" şirkətinin baş direktoru Duşan Bayatoviç və Serbiya Xalq Partiyasının sədri Nened Popoviç olub.
Təyyarənin geri qaytarılması barədə qərarı Belqrad hava limanının korporativ təhlükəsizlik üzrə direktoru Milan Kuç verib.
Nova portalının iddiasına görə, Aleksandr Vulin məcburi təhlükəsizlik yoxlamasından keçmədən təyyarəyə minib. Ehtimala görə, kimsə ona yoxlamadan yayınmağa kömək edib. Milan Kuç müşahidə kameralarının görüntülərini araşdırarkən qayda pozuntusunu aşkar edib və təyyarənin Belqrada qaytarılması barədə göstəriş verib.
Nəşrin məlumatına görə, təyyarə Belqrada eniş etdikdən sonra Vulin göyərtədən düşürülüb və onun baqajı yoxlanılmağa başlanılıb. "Vreme" nəşri isə öz mənbələrinə istinadən hava limanında siyasətçini prokurorun gözlədiyini yazıb.
Qeyd edək ki, Aleksandr Vulin Rusiyaya yaxın mövqeyi ilə tanınan serbiyalı siyasətçidir. "Vacib hekayələr" (Vajnıye istorii) nəşrinin yazdığına görə, o, Rusiyanın "Rostex" dövlət korporasiyasının medalı və "Dostluq" ordeni ilə təltif edilib, həmçinin Rusiyanın sabiq Federal Təhlükəsizlik Xidmətinin rəhbəri Nikolay Patruşevlə əməkdaşlıq edib.
