Böyük Britaniya Kralı III Çarlz qalmaqallı qardaşı şahzadə Endryunun qızları — şahzadə Beatris və Yevgeniyanı kral iqamətgahından çıxarır.
"RadarOnline" nəşrinin yaydığı məlumata görə, onlara artıq Londonda özlərinə yeni sığınacaq tapmaları barədə rəsmi məktub göndərilib.
Milli Audit İdarəsinin hesabatından məlum olub ki, kralın qardaşı qızları heç bir taxt-tac öhdəliyini yerinə yetirmədikləri halda, illərdir sarayda pulsuz yaşayıblar. Onların yaşayış xərcləri əvvəlcə mərhum Kraliça II Elizabet, daha sonra isə Kral III Çarlz tərəfindən şəxsi vəsait hesabına ödənilib. İnsayderlərin fikrincə, bu addım şahzadələri cəzalandırmaq məqsədi daşımır, kral mülklərindən daha səmərəli istifadə edilməsi və optimallaşdırma planının bir hissəsidir.
Xatırladaq ki, şahzadələrin valideynləri — şahzadə Endryu və Sara Ferqyuson da milyarder Ceffri Epşteynlə bağlı gənc qızların cinsi istismarı qalmaqalından sonra iqamətgahdan uzaqlaşdırılmışdılar. Bu hadisə Beatris və Yevgeniyanın da statusuna ciddi təsir göstərib; onlara Askot at yarışlarında iştirak qadağan edilib, şahzadə Uilyam isə ailə üzvlərinə onlarla məsafə saxlamağı tövsiyə edib. Hətta şahzadə Beatrisin həyat yoldaşı, biznesmen Edoardo Mapelli-Motsinin də bu qalmaqallar fonunda xanımından uzaqlaşdığı bildirilir.
