Azərbaycanın əfsanəvi caz pianoçusu Vaqif Mustafazadənin ilk nikahından olan qızı Lalə Mustafazadənin Fransadakı fəaliyyəti və beynəlxalq uğurları ilə bağlı maraqlı məlumatlar üzə çıxıb. Əzizə Mustafazadənin atabir bacısı olan Lalə uzun illərdir Avropada musiqi karyerasını davam etdirir və hətta məşhur beynəlxalq serialda rol alıb.
Insanoid.com xəbər verir ki, bu barədə jurnalist Hafiz Əhmədovun HafizTimes.com saytında dərc olunan araşdırmasında məlumat verilir.
Hazırda Lala Cholous adı ilə tanınan pianoçu 1991-ci ildə Fransanın Épinal şəhərində keçirilən Beynəlxalq Piano Müsabiqəsində birinci Qran-priyə layiq görülüb. Müsabiqənin rəsmi arxivində onun adı Azərbaycanı təmsil edən iştirakçı kimi qeyd olunub.
Atası Vaqif Mustafazadə cazla muğamı birləşdirən özünəməxsus musiqi üslubu ilə şöhrət qazansa da, Lalə peşəkar fəaliyyətini əsasən klassik fortepiano ifaçılığı istiqamətində qurub.
Onun karyerasının ən diqqətçəkən mərhələlərindən biri Paris Milli Operasında 20 ildən artıq davam edən fəaliyyəti olub. Araşdırmaya əsasən, Lalə Mustafazadə 1999-cu ilin sentyabrından 2019-cu ilin noyabrınadək burada pianoçu kimi çalışıb və balet artistlərinin gündəlik məşqlərini musiqi ilə müşayiət edib.
Pianoçu Fransadan başqa İtaliya, Almaniya, Böyük Britaniya və Rusiyada da konsert fəaliyyəti ilə məşğul olub.
Lalə Mustafazadənin yaradıcılığında daha bir maraqlı məqam onun kino dünyasına da addım atmasıdır. O, 2025-ci ildə Amazon Prime Video platformasında yayımlanan "Étoile" serialında pianoçu obrazını canlandırıb.
Paris və Nyu-Yorkdakı balet kollektivlərinin həyatından bəhs edən serialın aktyor heyətində Şarlotta Gensbur, Lu de Laaj və Lyuk Kirbi kimi tanınmış simalar da yer alıb.
Məlumata görə, Lalə Mustafazadə Fransada ailə qurduqdan sonra Cholous soyadını qəbul edib. O, musiqi fəaliyyətini davam etdirməklə yanaşı, rəqqaslar və digər ifaçılar üçün musiqi hazırlığı sahəsində də çalışır.
Beləliklə, Vaqif Mustafazadənin musiqi irsi yalnız dünya şöhrətli caz ifaçısı Əzizə Mustafazadənin deyil, klassik musiqidə öz yolunu seçmiş böyük qızı Lalənin yaradıcılığında da davam edir.
