Təmir və yenidənqurma işləri ilə əlaqədar noyabrın 3-də Bakının Yasamal, Səbail, Binəqədi və Xəzər rayonlarının bəzi ərazilərində elektrik enerjisinin verilişi müvəqqəti dayandırılacaq.
Insanoid.com xəbər verir ki, bu barədə "Azərişıq" ASC məlumat yayıb.
Yasamal rayonunda saat 10:00-dan 13:00-dək Abbas Mirzə Şərifzadə, Akim Abbasov, Bəsti Bağırova, Cəfər Cabbarlı, Zahid Xəlilov və Zivər bəy Əhmədbəyov küçələrində, həmçinin Mətbuat prospektinin bir hissəsində elektrik enerjisinin verilişində fasilə yaranacaq.
Səbail rayonunun Badamdar qəsəbəsinin 2-ci yaşayış massivində və Mikayıl Müşfiq küçəsində saat 10:00-dan 14:00-dək elektrik enerjisinin verilişi məhdudlaşdırılacaq.
Binəqədi rayonunun Sulutəpə və Xocəsən qəsəbələrinin bəzi ərazilərində saat 10:00-dan 13:00-dək, 10 May küçəsində və Xırdalan-Binəqədi yolunun aşağı hissəsində isə saat 10:00-dan 17:00-dək elektrik enerjisinin verilişində fasilə olacaq.
Xəzər rayonunun Buzovna qəsəbəsində yerləşən Albalılıq yaşayış massivində, eləcə də Abşeron, Abbasqulu Abdullayev, Baba Salahov, İzmir, Musa Nağıyev və Məmməd Namazov küçələrinin bəzi hissələrində saat 10:00-dan 16:00-dək elektrik enerjisi verilməyəcək.
"Azərişıq"dan bildirilib ki, təmir və yenidənqurma işləri başa çatdıqdan sonra qeyd olunan ərazilərdə elektrik enerjisi təchizatının keyfiyyətinin və dayanıqlılığının artırılması nəzərdə tutulur.
