Azərbaycan Prezidentinin köməkçisi Hikmət Hacıyev amerikalı iqtisadçı Cefri Saksla müsahibəsində ölkənin bərpaolunan enerji potensialı, Avropa ilə əməkdaşlıq və Ermənistanla sülh prosesindən danışıb.
İnsanoid.com-un məlumatına əsasən, Hacıyev bildirib ki, Avropa Komissiyasının sədri Ursula fon der Lyayenin Azərbaycana son səfəri zamanı müzakirələrin mühüm hissəsi Xəzər dənizinin sahillərindən Avropanın enerji sisteminə uzanacaq yaşıl enerji dəhlizinə həsr olunub. Onun sözlərinə görə, Azərbaycan yaxın bir neçə ildə bərpaolunan enerji mənbələri hesabına əlavə 2 giqavat, sonrakı illərdə isə daha 8 giqavat elektrik enerjisi ixrac etmək potensialına malik olacaq.
Prezidentin köməkçisi yaşıl enerjinin Ermənistanla sülh quruculuğunun da tərkib hissəsinə çevrilə biləcəyini vurğulayıb. O qeyd edib ki, Azərbaycan artıq regionda ayırıcı xətlər və divarlar qurmaq deyil, sülh yaratmaq və iqtisadi əlaqələri genişləndirmək istəyir.
"Biz regionu böyük güclərin döyüş meydanından böyük güclər üçün bazara çevirmək istəyirik. Tərəfdaşlarımıza sübut etmişik ki, ticarət aparmaq müharibə etməkdən daha yaxşıdır", – deyə Hacıyev bildirib.
O, 1994-cü ildə imzalanmış "Əsrin müqaviləsi"ni buna nümunə göstərib. Hacıyevin sözlərinə görə, həmin layihəyə ABŞ, Avropa, Türkiyə, ərəb ölkələri və hətta İran şirkətləri dəvət olunub.
Ermənistanla münasibətlərə toxunan Hacıyev bildirib ki, Azərbaycan rəhbərliyi qonşu ölkəyə sülh əlini uzadaraq iki seçimdən – əbədi müharibə və əbədi sülhdən ikincisini seçib. Onun fikrincə, məqsəd Cənubi Qafqazı əməkdaşlıq məkanına çevirməkdir.
Hacıyev əlavə edib ki, söhbət yalnız kağız üzərində sülh bəyanatından getmir. Azərbaycan uzunmüddətli sabitliyi təmin edəcək, gələcək nəsillər üçün dayanıqlı təhlükəsizlik arxitekturası qurmağa çalışır.
