Amerikalı tanınmış "Twitch" strimeri Leysi (Lacy / Nikolas Fosko) Yaponiyaya səfəri zamanı xoşagəlməz və gözlənilməz hadisə ilə üzləşib.
İnsanoid.com xəbər xarici KİV-ə istinadən xəbər verir ki, canlı yayım əsnasında restoran masasındakı QR kodun kameraya düşməsi izləyicilərə masanın onlayn menyusuna giriş imkanı yaradıb. Zarafat etmək istəyən izləyicilər qısa müddətdə minlərlə dollarlıq yemək sifarişi veriblər.
Gözlənilmədən ofisiantın yaxınlaşıb yeni sifarişləri dəqiqləşdirmək istəməsi strimeri təəccübləndirib. Masaya əlavə heç nə sifariş etmədiyini bildirən Leysiyə nəhəng hesabı təqdim ediblər. QR kodun yayımda göründüyünü anlayan strimer dərhal yayımı dayandırıb.
Məsələnin yekununda ümumilikdə 1,6 milyon yen (təxminən 20 400 manat) civarında hesab ödəməli olan bloger izləyicilərinə kəskin etirazını bildirib. O, bu hərəkətin həm restoran heyətinə əlavə yük yaratdığını, həm də israfçılığa səbəb olduğunu bildirib.
Strimer tərəfindən ödənilən yeməklər restoranda olan digər müştərilərə pulsuz olaraq paylanılıb.
