Yer kürəsində oktyabrın 30-dan 31-nə keçən gecə maqnit qasırğası gözlənilir. Rusiya Elmlər Akademiyasının Kosmik Tədqiqatlar İnstitutunun (İKİ RAN) Günəş Astronomiyası Laboratoriyasının proqnozuna görə, hadisənin başlamasına bir gündən az vaxt qalıb.
İnsanoid.com xəbər verir ki, mütəxəssislərin hesablamalarına əsasən, maqnit qasırğasının Bakı vaxtı ilə saat 03:00-04:00 radələrində başlaması gözlənilir. Bununla belə, hadisə proqnozlaşdırılan vaxtdan bir neçə saat əvvəl və ya gec başlaya bilər.
Alimlərin sözlərinə görə, hadisənin dəqiq başlama vaxtı Yerin orbit üzrə hərəkəti zamanı Günəşin tac dəliyindən yayılan plazma axını ilə nə vaxt qarşılaşacağından asılıdır.
Mütəxəssislər bildiriblər ki, Günəşdəki həmin tac dəliyi kifayət qədər böyükdür və son dövrlərdə müşahidə olunan ən iri nümunələrdən biridir.
Günəşdə baş verən proseslər nəticəsində Yerə çatan yüklü hissəciklər planetimizin maqnit sahəsində dəyişikliklərə səbəb olur. Bu dəyişikliklər maqnit qasırğası kimi qeydə alınır.
