Azərbaycanın "Rail Trans Service" şirkəti və Rusiyanın 1520 Şirkətlər Qrupu dəmiryolu avtomatlaşdırma və telemexanika sistemlərinin layihələndirilməsi, qurulması və tətbiqi ilə məşğul olacaq birgə müəssisə yaradacaq. Bu barədə 4 aprel tarixində Report məlumat verib.
Bildirilib ki, müəssisə Ağdam Sənaye Parkının ərazisində olacaq. Qeyd olunub ki, Rusiya şirkəti siqnalizasiya, mərkəzləşdirmə və bloklamanın qurulması üzrə avtomatlaşdırma sistemləri sahəsində bilik və təcrübəsi ilə bölüşəcək.
1520 Şirkətlər Qrupunun nümayəndəsinin sözlərinə görə, bu, ən qısa zamanda Azərbaycanda müasir dəmiryolu avtomatlaşdırma sistemini yaratmağa imkan verəcək.
Məlumata əsasən, 1520 Şirkətlər Qrupu artıq "Rail Trans Service" şirkəti ilə birlikdə Azərbaycan dəmiryolunun Böyük Kəsik – Ucar hissəsinin siqnalizasiya, mərkəzləşdirmə və bloklamanın müasirləşdirilməsi üzrə layihəni tamamlayıb. Bu hissənin bütün stansiyalarında yeni dəmiryolu siqnalizasiyası qurğularında qatarların dəyişən cərəyanla hərəkətinə start verilib.
Daha əvvəl şirkət Şimal-Cənub beynəlxalq nəqliyyat dəhlizi çərçivəsində Astara-İran dövlət sərhədi hissəsinin müasirləşdirilməsini həyata keçirib.
Ağdam Sənaye Parkında 30-dan çox rezidentin qeydiyyata alınması və 100 milyon manatdan çox investisiya qoyuluşu nəzərdə tutulur.
