Abşeron Rayon Mərkəzi Xəstəxanasının Mehdiabad Ailə Sağlamlıq Mərkəzinin bölmə müdiri Q. İsmayılovaya hökm oxunub, ona şərti cəza verilib.
Hökm martın 28-də Abşeron Rayon Məhkəməsinin hakimi Şövkət Nəcəfovanın sədrliyi ilə keçirilən prosesdə elan olunub. Bu barədə Report məlumat yayıb.
İsmayılova 2021-ci ilin aprel-sentyabr ayları ərzində vaksinasiya prosesinə düzgün nəzarət etməyib. O, möhürü özündə saxlamalı olduğu halda, ayrı-ayrı tibb müəssisələrinin işçilərinə verib.
O, ümumilikdə 67 nəfərin vaksinasiya olunmalarına dair elektron portala yalan məlumatlar daxil edib. Qanunsuz əməllərini ört-basdır etmək üçün 2 min 700 manat dəyərində 130 ədəd peyvənd flakonunu boşaldıb.
İsmayılova Cinayət Məcəlləsinin “ağır nəticələrə səbəb olan səhlənkarlıq” maddəsilə cinayətə cəlb edilib. İstintaq dövründə onun barəsində başqa yerə getməmək haqqında iltizam qətimkan tədbiri seçilmişdir.
