“Azərbaycan Dəmir Yolları” QSC (ADY) növbəti tədris ilinə görə əlavə reyslər təyin edir. Bu barədə 4 sentyabr tarixində ADY məlumat yayıb.
8 sentyabr tarixindən etibarən Abşeron dairəvi dəmir yolu xətti üzrə hərəkət edən şəhərətrafı sürət elektrik qatarları yenilənmiş hərəkət qrafiki üzrə fəaliyyət göstərəcək.
Bakı-Xırdalan-Sumqayıt marşrutu üzrə səhər saatlarında 2, axşam saatlarında 1 reys, Bakı-Pirşağı-Sumqayıt marşrutu üzrə isə axşam saatlarında 1 reys əlavə olunub.
Sumqayıt-Xırdalan-Bakı marşrutu üzrə səhər saatlarında 2 reys, Sumqayıt-Pirşağı-Bakı marşrutu üzrə isə axşam saatlarında 2 əlavə reys açılır.
Eyni zamanda ilk dəfə olaraq, qeyri-iş günləri üçün də xüsusi qrafik hazırlanıb. Yeni qrafikə əsasən, qatarlararası interval azaldılıb və hər iki istiqamət üzrə ümumilikdə əlavə 8 reys təyin olunub.
Yenilənmiş hərəkət cədvəlini www.ady.az ünvanından, Bakı Dəmiryol Vağzalından və Abşeron dairəvi dəmir yolu marşrutu üzrə bütün stansiya və dayanacaqlardan, elektrik qatarlarının monitorlarından, həmçinin sosial media hesablarından əldə etmək olar.
