Ali Məhkəmədə qəsdən sağlamlığa az ağır zərər vurmaqda təqsirləndirilən Əbdül Həsənovun (ad şərti) barəsindəki hökmdən verilən kassasiya şikayətinə baxılıb. Bu barədə Oxu.az 15 fevral tarixində xəbər verib.
Hakim İlqar Qılıcovun sədrliyi ilə keçirilən prosesdə qərar elan olunub.
Qərara əsasən, onun kassasiya şikayəti təmin edilib, birinci instansiya məhkəməsinin çıxardığı hökm dəyişdirilib, üç il azadlıqdan məhrumetmə cəzası 1 il 6 aya endirilib.
İttihama görə, Əbdül Həsənov arvadının tanışı Qəhrəman Qəhrəmanovla (ad şərti) yaxın münasibət qurmaqla ona xəyanət etdiyini öyrənib. Daha sonra o, bir neçə dəfə Qəhrəmanla görüşüb həyat yoldaşından əl çəkməsini, ailəsini dağıtmamasını tələb edib.
Buna baxmayaraq, arvadının zərərçəkmişlə 6 noyabr 2021-ci il tarixdə saat 22:00 radələrində telefonla yazışdığını görüb. Daha sonra Həsən mətbəx bıçağını götürüb cibinə qoyaraq arvadı ilə görüşmək üçün gözləyən Qəhrəmana yaxınlaşıb, onun qarın və kürək nahiyəsindən iki dəfə qəsdən vurub. Xəstəxanaya çatdırılan yaralının həyatını xilas etmək mümkün olub.
Bakı Apellyasiya Məhkəməsinin hökmü ilə o, üç il müddətinə azadlıqdan məhrum edilib.
