Bu gün, martın 28-də güləş üzrə Avropa çempionatında beş Azərbaycan güləşçisi mübarizəyə başlayıb. Onların hamısı yarımfinala vəsiqə qazanıb.
Əliabbas Rzazadə (57 kq) Levan Metreveli (İspaniya) və Mikyay Salim Naimiyə (Bolqarıstan) qalib gəlib. Əliabbasın yarımfinalda rəqibi Beka Bujiaşvili (Gürcüstan) olacaq.
Hacı Əliyev (65 kq) Munir Aktaşı (Türkiyə) məğlub edib. Hacı yarımfinalda Maksim Sakultan ilə qarşılaşacaq.
Zirəddin Bayramov (70 kq) ardıcıl olaraq Daniel Antalı (Macarıstan) və Fati Veyseliyə (Şimali Makedoniya) qalib gəlib və yarımfinalda onu Zurabi Yakobişvili (Gürcüstan) ilə görüş gözləyir.
Əşrəf Aşırov (79 kq) isə Miroslav Kirovu (Bolqarıstan) və Arman Avaqyanı (Ermənistan) müvafiq olaraq 9-0 və 11-0 məğlub edərək yarımfinala çıxıb. Onun rəqibi Vladimeri Gamkrelidze (Gürcüstan) olacaq.
Məhəmmədxan Məhəmmədov (97 kq) ilk görüşündə Lukas Krasauskasdan (Litva), ardınca isə Elizbar Odikadzedən (Gürcüstan) üstün olub. Yarımfinalda isə Zbiqnev Baranovskinin (Polşa) müqavimətini qırmağa çalışacaq.
Qeyd edək ki, yarımfinal qarşılaşmaları bu gün Bakı vaxtı ilə saat 20:00-da başlayacaq.
