Həftəlik illüstrasiyalı ilk Azərbaycan jurnalı “Molla Nəsrəddin”-in birinci nömrəsi 7 aprel 1906-cı ildə çıxmışdır.
Bu jurnal 1906-1918-ci illərdə Tiflisdə, 1921-ci ildə Təbrizdə, 1922-1931-ci illərdə Bakıda nəşr olunurdu. Mövcud olduğu 25 il ərzində onun 800 nömrəsi çap olunmuşdur. Onun redaktoru və təsisçisi Mirzə Cəlil adı ilə tanınan yazıçı və publisist Cəlil Məmmədquluzadə olub.
“Molla Nəsrəddin” jurnalı həftədə bir dəfə Azərbaycan dilində çıxırdı və 8 səhifədən ibarət idi. Bu jurnal bütün müsəlman dünyasında və Yaxın Şərqdə rəngli və şəkilli yeganə satirik nəşr idi. Jurnalda ictimai bəlaların tənqidinə və ifşasına, rəngli karikaturalara geniş yer verilirdi.
Jurnalın ilk nömrəsinin üz qabığındakı şəkildə yuxuya getmiş bir dəstə müsəlman təsvir olunmuşdur. Müdrik ağsaqqal Molla Nəsrəddin yatanların yanında durub onları oyatmaq istəyir. Bu karikaturanı Tiflisdə yaşayan alman rəssamı Oskar Şmerlinq çəkmişdi. Jurnalın ikinci səhifəsini “Sizi deyib gəlmişəm” məqaləsi tuturdu. Sonrakı səhifələrində satirik xəbərlər, teleqramlar, atalar sözləri, “Dəllək” hekayəsi, “Lisan bəlası” felyetonu və dörd karikatura çap olunmuşdur.
“Molla Nəsrəddin” Azərbaycanda ədəbi məktəb yaradan ilk mətbuat orqanı idi. Jurnalın mətnləri çox sadə, karikaturaları isə dərhal başa düşülən idi.
Jurnal 1931-ci ilə qədər fəaliyyət göstərmişdir. Buna səbəb isə 1930-cu illərin əvvəllərində hakimiyyət orqanlarının Mirzə Cəlildən sovet ideologiyasına uyğun gəlməsi üçün jurnalın adını dəyişdirib “Allahsız” qoyması tələbi idi. Mirzə Cəlil bununla razılaşmadığına görə, sonralar baş redaktor vəzifəsini tərk etmişdir.
