İsraildə Azərbaycanın turizm nümayəndəliyinin Təl-Əviv ofisinin açılışı olub. Bu haqda martın 31-də Dövlət Turizm Agentliyindən məlumat verilib.
Agentliyin sədri Fuad Nağıyevin sözlərinə görə, bu addım İsraildə Azərbaycan haqqında məlumatlılığın artmasına və ikitərəfli turizm əlaqələrinin möhkəmlənməsinə töhfə verəcək. O diqqətə çatdırıb ki, xalqlarımız arasında mədəni-tarixi əlaqələr, qarşılıqlı dostluq və anlaşma turizm münasibətlərinin inkişafında mühüm rol oynayır.
Səfər çərçivəsində Dövlət Turizm Agentliyi ilə İsrail Turizm Nazirliyi arasında turizm sahəsində əməkdaşlıq haqqında Saziş imzalanıb. Sözügedən sazişə əsasən, tarixi, rəqəmsal, ekoloji, macəra turizmi üzrə əməkdaşlığı genişləndirmək, mədəni irs və dini məkanlara səyahətləri təşviq etmək öhdəliyi götürülüb.
Eyni zamanda, Azərbaycan nümayəndə heyəti 29-30 martda Təl-Əvivdə baş tutan “Beynəlxalq Aralıq dənizi Turizm Bazarı” sərgisində iştirak edib. Orada ölkənin turizm imkanları, o cümlədən Qarabağın turizm potensialı nümayiş etdirilib.
Qeyd edək ki, pandemiyadan öncə Azərbaycana səfər edən İsrail vətəndaşlarının sayı 47 min nəfər təşkil edib.
