Azərbaycan əhalisinin sayı 2022-ci il oktyabr ayının 1-i vəziyyətinə 10 204 774 nəfərə çatıb. Bu barədə noyabrın 16-da Dövlət Statistika Komitəsindən məlumat verilib.
İlin əvvəlindən əhalinin sayı 48 408 nəfər artıb. Əhalinin 52,9 faizini şəhər, 47,1 faizini kənd sakinləri təşkil edir.
Bu il Azərbaycanda 93 612 körpə doğulub. Onlardan 2 630 əkiz, 117 üçəm, 8 dördəm doğulub.
Bu ilin 9 ayında ölkə üzrə 46 372 ölüm halı qeydə alınıb. Ölüm səviyyəsi azalaraq 7,5-dən 6,1-ə düşüb.
Bu ilin yanvar-sentyabr aylarında 45 321 nikaha daxilolma və 11 819 boşanma halları qeydə alınıb. Bildirilib ki, əhalinin hər 1000 nəfərinə 2021-ci ilin müvafiq dövrü ilə müqayisədə nikahların sayı 5,5-dən 6,0-a qədər artıb, boşanmaların sayı isə azalaraq 1,7-dən 1,6-ya düşüb.
