Azərbaycan boksçusu Aynur Rzayeva dünya çempionatında yarımfinala yüksəlib. Bu haqda 23 mart tarixində Boks Federasiyası məlumat verib.
Mundial Hindistanın paytaxtı Yeni Dehlidə keçirilir. 81 kq çəki dərəcəsində mübarizə aparan təmsilçimiz 1/4 finalda Selin Li-Loya (Yeni Zelandiya) 5:0 hesabı ilə qalib gələrək ən azı bürünc medalı təmin edib.
Beləliklə, A. Rzayeva adını Azərbaycanın qadın boks tarixinə yazdırıb. Mundiallarda indiyədək yerli idmançımız bu mərhələyədək irəliləmədiyindən Aynur ilki rəsmiləşdirib.
Boksçumuz yarımfinalda qazaxıstanlı Lazzat Kunqeybayeva ilə döyüşəcək.
Qeyd edək ki, 2,4 milyon ABŞ dolları mükafat fondu olan mundiala 65 ölkədən 300-dən artıq boksçu qatılıb.
