Azərbaycan Xalq Cümhuriyyətinin üçrəngli Dövlət Bayrağı 9 noyabr 1918-ci ildə qəbul edilib, Azərbaycanın bolşevik Rusiyası tərəfindən işğalına kimi dövlət rəmzi olub.
Bayraqda mavi rəng - Azərbaycan xalqının türk mənşəli olmasını bildirir, qırmızı rəng - müasirliyi, inkişafa istəyi ifadə edir, yaşıl rəng - İslam dininə mənsubluğu göstərir. Qırmızı rəngin üzərində ortada aypara və səkkizguşəli ulduzun təsviri mövcuddur. Bayrağın üzərindəki aypara türk xalqlarının simvolu hesab edilir. Səkkizguşəli ulduzun mənası ilə bağlı bir neçə fikir var. Birinci versiyaya görə, əvvəllər “Azərbaycan” sözü səkkiz hərflə yazıldığından ulduz da səkkizguşəli olub. Digər versiyaya əsasən, tarixdə səkkizguşəli ulduz türkçülük, islamçılıq, bərabərlik və s. mənaları daşıdığından bayrağa əlavə edilib.
Üçrəngli bayraq 17 noyabr 1990-cı ildə ümummilli lider Heydər Əliyevin rəhbərliyi ilə keçirilən sessiyada Naxçıvan Muxtar Respublikasının Dövlət Bayrağı kimi təsdiq edilib. 5 fevral 1991-ci ildə “Azərbaycan Respublikasının Dövlət bayrağı haqqında” qanun qəbul edilib və AXC-nin üçrəngli bayrağı Dövlət Bayrağı elan olunub.
17 noyabr 2009-cu ildə Azərbaycan Respublikasının Dövlət Bayrağı Günü haqqında Qanun qəbul edilib. Həmin Qanuna əsasən, AXC-nin Dövlət Bayrağının qəbul edildiyi gün - 9 Noyabr Azərbaycanda Dövlət Bayrağı Günü kimi qeyd edilir.
